منتدي مروي شرق
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

شاعر الكبير (ود العبيد) صاحب الأغاني الباقية أمثال:

اذهب الى الأسفل

شاعر الكبير (ود العبيد) صاحب الأغاني الباقية أمثال: Empty شاعر الكبير (ود العبيد) صاحب الأغاني الباقية أمثال:

مُساهمة  hudhud الأحد سبتمبر 08, 2013 4:29 am

شاعر الكبير (ود العبيد) صاحب الأغاني الباقية أمثال:

متين يصل الحنين و الناس تريدو و اصافح لي عمر و احضر جديدو

له معي مساجلات طريفة وسيلتها رسائل الجوال، وقد محوت الكثير من رسائله بسبب ضيق بطن هاتفي الذي لا يسع الكثير، و أردت أن أشرككم في قراءة بعض ما تبقى منها لتستمتعوا بأسلوبه الفَكِه و تهكمه اللاذع،

آخر رسالة تسلمتها منه كان موضوعها عن الضواري التي زعموا أنها تهاجم الناس في بيوتهم ليلا بأطراف العاصمة،وقد قال عنها عمنا ود العبيد:

الضبعة مزهللي الناس في الدروشاب
يتعشو المغيرب و يقفلو الباب
و كل شي ربي يجعل ليهو أسباب
لا ولدك مرق بارالو أصحاب
لا بتك تحوم في الليل معا شاب
بس التاكل الحرامي الاصلو ما غاب!!

و قبلها بقليل أرسل لي برسالة في نفس الموضوع:

الكلام في الليل الوحوش حرّمتنا المرقة للحوش
إن بقت قرماني للدوش هلتفتش أبان كروش.... نحن دمنا يبسو البوش!

و في رسالة أخرى يقول و قد عاوده الحنين للبلد:

قولولي الطشيش الفي البنادر خَلُّو
بيتك في البلدمابتلقى ضل زي ضلو
أولادك يوالفو الخلوةفيها يصلوا
و فوق اسق جدودن يطلعو و يندلو

و هذا لعمري من بديع الكلام ،و يفيض صدقا و حنينا.

رسالة أخرى أرسلها ابتهاجا بفوز الهلال على المريخ، و نيله لكأسي السودان و الممتاز:

نورقنا القمح و دقينا عيش الصيف!
خلينا الوصيف في الساقي حايم ضيف
عام 2010 معانا يعملو كيف
قدامن جبل و الموج مضايق القيف

جدير بالذكر أن ود العبيد أشد تعصبا للهلال من تعصب كدكي للمريخ!!، و في رسالة أخرى يذكر فيها انتقال اللاعب ريتشارد من الهلال للمريخ:

ريتشار كان مبحبح في الهلال و سعيد
من تشرق عليهو و للمغيب في عيد
خلاهو و رحل سكن الغزالي بعيد
زي دا نقول عليهو أقلّ حاجة بليد!!

و عن اللاعبين الأجانب يقول:

اندثرت مواهبنا و غفلنا كتير
و مالنا مشتتنو يلقطوهو الغير
لاعبين بالإجار ما من وراهم خير
و يابخت الرّهَو يجي يستفيد و يطير !!!

و أخيرا، حيا الله الشاعر المُجيد محمد العبيد سيد احمد، وهو مٍمّن تشرُفُ بهم مروي شرق،
و اعتذر له عن ابطائي في الرد على رسائله الفريدة و:

ياالسأل عني انا حالي كيف شاهد الله انا سائل عليك
في الجواب اقرا سطر و اقيف واسأل المولى العافي ليك
مروي من عسوم لا الطريف مافي زولا مو مشتهيك
داره تعمر و الصف يقيف و مرّه مرّه الشبال يجيك.........
hudhud
hudhud
Admin

عدد المساهمات : 42
تاريخ التسجيل : 27/02/2008
العمر : 38

https://marui.mam9.com

الرجوع الى أعلى الصفحة اذهب الى الأسفل

الرجوع الى أعلى الصفحة

- مواضيع مماثلة

 
صلاحيات هذا المنتدى:
لاتستطيع الرد على المواضيع في هذا المنتدى